Sa dakong kalampusan sa kampanya batok sa krimen, nasikop na sa kapulisan ang usa sa labing gipangita nga kriminal sa Central Visayas niadtong gabii sa Mayo 6, 2025.
Ang suspetsado, nga apil sa Top 6 Most Wanted sa rehiyon, gidakop sa mga sakop sa San Remigio Municipal Police Station uban sa tabang sa Sogod Police Station. Nadakpan siya sa Barangay Mahogany, San Remigio alas 8:20 sa gabii, base sa mando sa korte nga wala’y girekomendar nga piyansa tungod sa kaso nga pagpatay.
Sumala sa kapulisan, dugay na nga nagtago-tago ang suspetsado apan pinaagi sa lig-on nga imbestigasyon ug koordinasyon, sa kataposan nasikop kini.
Ang operasyon kabahin sa kusog nga kampanya sa Philippine National Police (PNP) batok sa mga wanted persons, subay sa mando ni PNP Chief, Police General Rommel Francisco D. Marbil.
Gisiguro sa kapulisan nga anaa na sa kustodiya sa San Remigio PNP ang suspetsado samtang gi-andam ang legal nga proseso batok kaniya.
Matod ni Police Brigadier General Redrico A. Maranan, Regional Director sa PRO-7, dili lang kini papel nga kalampusan. Kini timaan nga ang kapulisan nagserbisyo og tinud-anay para sa katawhan. uban sa pag saludo sa mga operatiba na nidakop sa suspetsado.
Source: PRO7-PIO
I via Renante Socia Lada