Usa ka otso anyos nga batang lalaki ang namatay human malumos sa Cancalanog Falls nga nahimutang sa Barangay Compostela sa lungsod sa Alegria, Cebu, pasado alas dos sa hapon niadtong Martes, Mayo 6, 2025. Ang biktima nailhan nga si Charles Niño Marines, taga Purok 3, Estaca, Barangay Tunghaan, Minglanilla, Cebu.
Uban sa iyang amahan ug maguwang nga igsoon nga babaye, miuban siya sa usa ka lakaw paingon sa maong falls diin ang agawon sa iyang amahan nag-organisar og panagtapok uban sa iyang mga kauban sa trabaho. Base sa imbestigasyon sa kapulisan sa Alegria, mitambong ang pamilya sa panagtapok ug nangaon sa ilang paniudto.
Giingon nga gipahimangnoan pa sa amahan ang biktima nga dili una maligo kay kini wala pa makakat-on sa paglangoy.
Apan, pagkahuman sa pagkaon, wala mabantayi sa amahan nga nilakaw na ang bata. Usa ka oras ang milabay, namatikdan sa amahan nga nawagtang sa iyang panan-aw ang anak, maong dali nilang gipangita kini.
Nangayo og tabang ang mga kauban sa trabaho ug ang mga naligo sa falls, apan wala dayon makit-i ang biktima. Hangtod nga usa ka bata nga naligo ang nakakita sa lawas sa biktima ilawom sa tubig. Dali kini gikuha ug girespondehan dayon sa mga personnel sa Local Disaster Risk Reduction and Management (LDRRM) sa Alegria.
Gihimo ang CPR sa biktima ug gidali og transport sa M.J. Cuenco Hospital sa Malabuyoc, apan gideklarar kini nga dead on arrival.
Padayon ang pahimangno sa lokal nga mga awtoridad sa katawhan nga magbantay sa mga bata ilabi na sa mga lugar nga delikado sama sa mga sapa, suba ug falls.
I via Renante Socia Lada