Nagpadayon karon ang agresibong kampanya sa Police Regional Office 7 batok sa kriminalidad, labi na kay nagkadool na ang holiday season. Bag-ohay lang sila nakasakmit og iligal nga drogas nga nagkantidad og PHP3.9 milyon atol sa duha ka operasyon.
Sa Cebu City, gidakop sa kapulisan sa Regional Police Drug Enforcement Unit 7 (RPDEU7) uban sa Police Station 4 sa Cebu City Police Office (CCPO) ang usa ka 27-anyos nga high-profile nga suspetsado ginadiling drogas alas 8:55 sa gabii, Disyembre 16, 2024.
Atol sa pagdakop, nasakmit ang 205 gramos nga iligal nga drogas nga nagkantidad og PHP1,394,000, lakip na ang nagkalain-laing drug paraphernalia.
Sa laing operasyon, usa ka e-bike driver ang nadakpan alas 12:40 sa kaadlawon sa Disyembre 17, 2024 sa Purok Sambag, Barangay San Roque, Siyudad Talisay. Ang nadakpan adunay dala nga 375 gramos nga iligal nga drogas nga nagkantidad og PHP 2,550,000. Ang operasyon gipangunahan sa Talisay City Police Station ug sa Drug Enforcement Unit sa Cebu Police Provincial Office (CPPO).
Matod ni PRO-7 Officer-In-Charge PBGen Roy Parena, ang kooperasyon tali sa kapulisan ug komunidad nakatampo og dako sa pagkakunhod sa suplay ug panginahanglan sa iligal nga drogas sa rehiyon.
“These operational accomplishments significantly contribute to maintaining peace and order in our communities. We express our gratitude to our police force on the ground, who remain dedicated to their mandate of protecting and ensuring the safety of the Central Visayas community,” dugang ni PBGen. Parena.
Ang mga suspetsado anaa na sa kustodiya sa kapulisan ug mag atubang kini og kasong kalapasan sa Republic Act 9165 o ang Comprehensive Dangerous Drugs Act.