Gipahigayon sa Cebu Provincial Government ang pagpasidungog sa tulo ka mga centenarians gikan sa unang distrito sa Sugbo tungod sa ilang mahinungdanong papel sa komunidad.
Si Gobernador Gwen Garcia personal nga naghatag og tseke nga nagkantidad og P100,000 kada usa isip pasalamat ngadto kang Lola Profiria Alcorcon ug Lola Flora Tanudra Aledon gikan sa Carcar City, ug kang Lolo Vicente Adlawan Restauro gikan sa Talisay City atol sa Caravan of Government Services nga gipahigayon sa Minglanilla Municipal Complex, Disyembre 17, 2024.
Ang tulo ka centenarians natawo niadtong Nobiyembre 1924. Gibutyag nila nga ang sekreto sa taas nga kinabuhi mao ang pag-obserbar sa himsog nga pagkaon sama sa mais, mga utan nga Bisaya, ug isda — nga inubanan sa gahom sa pag-ampo.
Gawas sa cash grant, gidawat usab nila ang mga adult wheelchairs ug ang mga ABAG Sugbo QR-coded cards. Kini nga card maghatag kanila og libre nga serbisyo medikal ug tambal sa bisan asa sa 16 ka mga Capitol-run hospitals.
Ang mga nag-atiman kanila nakadawat usab og mga certificates of entitlement nga naghatag kanila og kahigayunan sa programa sa Kapitolyo nga Sugbo Kahanas, diin libre nga teknikal ug vocational skills training ang ipahigayon alang sa kwalipikadong mga benepisyaryo.
Ang Department of Social Welfare and Development (DSWD) nidugang usab sa ayuda pinaagi sa paghatag og P2,000 nga cash assistance ug mga family food packs.
Ang Department of Interior and Local Government (DILG) naghatag og pares nga tsinelas ug lima ka kilo nga bugas; samtang dugang lima ka kilo nga bugas ang gihatag sa Ako Bisaya Partylist.
Source: Cebu Provincial Capitol, PIO
I via Renante Socia Lada