Usa ka kanhi nga miyembro sa Communist Terrorist Group (CTG) ang misurender sa mga otoridad atol sa usa ka police operation sa lungsod sa Carmen, Bohol niadtong Hulyo 27, 2025.
Sa alas 10 sa buntag, gipatuman sa 702nd Maneuver Company sa Regional Mobile Force Battalion 7 (RMFB7) ug Community Integrated Information Support (CIIS) ang operasyon nga misangpot sa boluntaryong pagsurender ni alyas “Lay,” 44 anyos, nga residente sa Barangay Montesuerte, Carmen. Si Lay usa ka kanhi full-time member sa Hugpong Mag-uumang Bol-anon – Kilusang Magbubukid ng Pilipinas (HMB-KMP), sakop sa Front Committee 3 sa Central Visayas Regional Party Committee.
Gawas sa pagsurender, mitunol usab si Lay og usa ka hand grenade. Siya karon gilakip sa Enhanced Comprehensive Local Integration Program (E-CLIP) o Kauban sa Reporma Program, diin makadawat siya og tabang alang sa iyang pagbalik sa normal nga kinabuhi, subay sa kampanya sa gobyerno batok insurhensiya.
Matod ni PBGEN Redrico A. Maranan, Regional Director sa PRO7, ang maong kalampusan timaan sa kusog nga paningkamot sa kapulisan ug lokal nga komunidad nga tabangan ang mga kanhi rebelde nga mobalik sa sabakan sa balaod. Gisaad usab sa mga otoridad ang kaluwasan ni Lay samtang gi-proseso ang iyang benepisyo ilawom sa ELCAC program.
Source: PRO7
I via Renante Socia Lada