Dako nga kantidad sa smuggled ug peke nga sigarilyo ang nasakmit sa joint operation sa Cebu City Police Office (CCPO) ug Bureau of Internal Revenue (BIR) niadtong Pebrero 19, 2026 sa nagkalain-laing lugar sa Cebu City.
Sa tibuok adlaw nga operasyon, nakumpiska ang 135,936 ka pakete sa sigarilyo nga gituohang smuggled ug counterfeit. Base sa final inventory, ang total nga kantidad niini mokabat og ₱138,099,550.34. Nagpakita kini sa kadako sa problema sa ilegal nga produkto sa tabako ug sa kampanya sa gobyerno batok sa economic sabotage ug tax evasion.
Sumala kang CCPO Officer-in-Charge nga si George V. Ylanan, gidayeg niya ang mga operatiba sa ilang disiplina ug propesyonalismo sa pagpatuman sa operasyon.
Giingon usab niya nga padayon ang lig-on nga koordinasyon tali sa mga ahensya aron mapugngan ang pagbaligya sa ilegal nga produkto.
Gipasidaan sa kapulisan ang mga indibidwal ug grupo nga nalambigit sa paghimo, pag-apod-apod, ug pagbaligya sa smuggled ug peke nga sigarilyo nga atubangon nila ang kaso sumala sa balaod. Ang tanang nasakmit nga produkto gipailalom na sa hustong dokumentasyon ug legal nga proseso.
Nagpasalig ang CCPO nga magpadayon sila sa pagpanalipod sa lehitimong negosyo, kita sa gobyerno, ug kalinaw ug kahapsay sa Cebu City.
Source: CCPO
I via Renante Socia Lada