Gipangulohan sa Cebu Provincial Youth Development Office (CPYDO), ang Youth Wellness Caravan diin nagdala og mga programa ug diskusyon para sa kabatan-onan sa tibuok probinsya, karon nakaabot sa Sta. Fe, Bantayan Island ug San Francisco, Camotes Islands.
Sa Sta. Fe Sports and Cultural Center, kapin sa 600 ka senior ug junior high school students gikan sa Marikaban Integrated School ug Sta. Fe National High School ang nitambong sa ikatulong hunong sa caravan. Ang mga estudyante aktibong miapil sa open conversations nga nagtan-aw sa pagpalambo sa maayong panglawas ug kahibalo sa kinabuhi. Gihatagan usab sila og tote bags ug gamay nga keepsakes gikan sa CPYDO.
Human niini, ang caravan nibisita sa Cebu Technological University (CTU) sa San Francisco, Camotes, diin kapin sa 800 ka estudyante gikan sa CWTS, ROTC, ug LTS programs ang miapil sa usa ka adlaw nga learning, dialogue, ug engagement. Gipahigayon usab sa Rural Health Unit (RHU) sa San Francisco ang libreng voluntary HIV testing sa mga partisipante.
Gihisgutan sa caravan ang mga mahinungdanon nga hilisgutan sama sa mental health ug suicide prevention, oral health, HIV/AIDS & STI awareness, adolescent sexuality, reproductive health, teenage pregnancy awareness, ug responsible digital use aron mapalambo ang kabatan-onan sa maayong desisyon ug responsableng pamatasan.
Gikan sa Bantayan paingon sa Camotes, nagpamatuod ang Youth Wellness Caravan nga ang wellness dili lang usa ka event, kundili usa ka padayon nga commitment sa pag-atiman sa kahimsog ug kaayohan sa kabatan-onan.
Source: Cebu Province PIO
I via Renante Socia Lada