Upat ka tawo ang namatay human magbangga-an ang usa ka habal-habal nga motorsiklo sa delivery wing van sa Sitio Maaslom, Barangay Busay, Cebu City alas 2:00 sa hapon niadtong Martes, Marso 10, 2026.
Lakip sa mga namatay ang driver sa habal-habal nga si Jose Gacayan Jr., 26 anyos, taga Barangay Malubog. Namatay usab ang iyang duha ka pasahero nga sila Ereneya Lopez, 60 anyos, ug Felex Vasquez, 50 anyos, nga taga Sitio Tugob, Barangay Babag.
Ang tulo sakay sa usa ka Honda Beat nga motorsiklo ug dead-on-the-spot human sa bangga.
Ang driver sa wing van gidala pa sa Vicente Sotto Memorial Medical Center apan wala na kini matabang tungod sa grabeng kadaot sa lawas. Napiit pa kini sulod sa van human kini midasmag sa usa ka konkretong istruktura sa daplin sa dalan.
Naluwas ang pahinante sa van nga miingon nga kalit lang nawad-an og brake ang ilang sakyanan samtang nagdulhog sila paingon sa syudad. Tungod niini, nakabangga sila sa habal-habal nga ilang nasugatan nga nagtungas sa maong dalan.
Sumala pa sa pahinante, gikan pa sila sa biyahe sa Luzon sa dihang nahitabo ang aksidente. Padayon karon ang imbestigasyon sa Traffic Enforcement Unit sa Cebu City Police Office aron matino ang tinuod nga hinungdan sa aksidente ug kung kinsa ang tag-iya sa wing van.
I via Renante Socia Lada