Nagpahigayon og tigum ang Cebu Provincial Government uban sa mga orthopedic surgeon aron maghimo og plano nga mapalig-on ang serbisyo sa mga provincial ug district hospital sa probinsya.
Gihimo ang maong panagtigom niadtong Martes, Marso 10, uban kang Capitol Health Consultant Dr. Nikki Catalan ug sa mga orthopedic surgeon nga nagserbisyo sa nagkalain-laing ospital sa probinsya. Tumong niini nga mapaduol sa katawhan ang espesyal nga pagtambal sa bukog ug lutahan.
Sumala sa Kapitolyo, daghan kaayong kaso sa bukog ug lutahan ang gidala sa dagkong ospital sa Cebu City, hinungdan nga magsige og kadugay ang paghulat sa mga pasyente. Pinaagi sa pagpalig-on sa serbisyo sa mga ospital sa probinsya, mahimo nang matambalan ang ubang pasyente duol sa ilang lugar.
Matud pa ni Dr. Catalan, kung lig-on ang mga ospital sa probinsya, mas paspas ang serbisyo, mubo ang paghulat sa pasyente, ug mas maayo ang resulta sa ilang pagtambal.
Kabahin kini sa health reform program ni Cebu Governor Pamela Baricuatro nga nagtinguha nga mapagaan ang kadaghanon sa pasyente sa dagkong ospital pinaagi sa paghatag og modernong kagamitan ug dugang nga eksperto sa mga ospital sa probinsya.
Source: Cebu Province PIO
I via Renante Socia Lada