Nasikop sa Naga City Police Station ang usa ka lalaki nga gipangita sa balaod tungod sa ilegal nga pagpanag-iya og armas, atol sa usa ka intelligence-driven operation niadtong buntag sa Pebrero 4, 2026.
Ang suspek nailhan sa alyas nga “Ryan,” 33 anyos, trabahante ug residente sa Purok Seaside Fatima, Barangay Tinaan, Naga City, Cebu. Siya nadakpan sa Barangay South Poblacion sa hiniusang operasyon sa Intelligence, Drug Enforcement Unit (DEU), ug Tracker Team sa Naga City Police.
Ang pagdakop gibase sa Warrant of Arrest nga gi-isyu niadtong Oktubre 12, 2023 sa Regional Trial Court Branch 76, Naga City, tungod sa paglapas sa Republic Act 10591 o ang balaod batok sa ilegal nga armas ug bala. Ang piyansa sa kaso gitakda sa ₱87,000.
Sumala sa rekord sa pulis, nasikop na usab ang suspek kaniadtong 2018 sa susamang kaso apan wala motungha sa mga hearing sa korte, mao nga gi-isyuhan siya og alias warrant of arrest. Nakumpirmar usab nga nag-atubang pa siya og laing kaso ilalom sa Republic Act 9165 ug kasamtangang detained sa Naga City Detention Facility.
Gipasalamatan ni Provincial Director PCOL Abubakar Udang Mangelen Jr. ang operating team ug giingon nga padayon ang determinasyon sa PNP sa pagdakop sa mga tawo nga naglikay sa hustisya aron masiguro ang kaluwasan sa publiko sa probinsya.
Source: CPPO
I via Renante Socia Lada