Nibalik na sa normal ang kadaghanan sa tourism activities sa tibuok lalawigan sa Cebu human miayo ang kahimtangan sa panahon tungod sa paghunong sa Tropical Storm Basyang. Bisan pa niini, padayon gihapon ang pagsira sa canyoneering activities sa mga lungsod sa Badian ug Alegria isip lakang sa paglikay ug siguridad, basi sa taho kagahapong adlawa Pebrero 7, 2026.
Sumala sa Provincial Disaster Risk Reduction and Management Office (PDRRMO), gitangtang na ang White Alert Status sa lalawigan sa Cebu human makita nga mikalma na ang panahon ug wala nay dakong hulga sa kaluwasan sa katawhan.
Sa alas-8 sa buntag niadtong Pebrero 7, 2026, dako na kaayo ang kausaban sa panahon sa tibuok lalawigan, busa gipaubos ang alert status gikan sa Blue ngadto sa White ug gi-demobilize na usab ang Emergency Operations Center (EOC).
Hangtod alas-5 sa hapon sa maong adlawa, nibalik na sa normal ang klase, trabaho, ug operasyon sa mga pantalan. Ang tanang pasahero ug evacuees nga na-stranded kaniadto nakapauli na nga luwas, ug walay natala nga namatay o nadaut nga balay.
Samtang, padayon nga fully operational ang tanang Cebu Provincial ug District Hospitals, lakip ang mga Rural Health Units, aron masiguro ang padayon nga serbisyo panglawas. Ang gobyerno sa lalawigan mipahimangno gihapon sa publiko nga magmatngon ug kanunay mosunod sa opisyal nga advisories, bisan pa og miayo na ang kahimtangan sa panahon.
Source: Capitol PIO
I via Renante Socia Lada