Malipayon nga gipahibalo sa Department of Veterinary Medicine and Fisheries (DVMF) nga zero o wala gyud na-euthanize nga mga iro gikan sa dog pound sa siyudad gikan sa Enero hangtod Marso 2025, tungod sa kalampusan sa ilang Catch, Neuter, Vaccinate, Return (CNVR) program.
Matod ni Dr. Alice Utlang, hepe sa DVMF, “Kaluoy sa Ginoo, sukad Enero hangtod karong Mayo 6, wala gyud tay gi-put to sleep nga iro nga na-impound.”
Gipasabot ni Dr. Utlang nga tungod kay nagpalig-on na sila sa CNVR program, wala na nagkinahanglan nga euthanize-on ang mga iro nga masakiton. Imbes patyon, ila kining gi-neuter, gi-vaccinate, ug gibalik sa ilang lugar kung asa sila komportable.
Sa datos sa DVMF, 2,033 ka iro ang na-impound sukad Hunyo hangtod Disyembre 2024, ug 974 sa niini ang gipagawas human maagi sa CNVR. Sa unang tulo ka bulan karong 2025, 255 ka iro ang na-release pinaagi gihapon sa maong programa.
Kaniadto, sa parehas nga mga buwan, 184 ka iro ang na-euthanize. Karon, tungod sa CNVR, wala nay usa.
Gipasabot pa ni Dr. Utlang nga ang mga iro nga buhi ug himsog, imbes kuhaon sa dalan ug i-impound, mas maayo pa nga i-adopt o pasagdan nga buhi sa ilang palibot basta di lang makahatag og piligro.
Source: Cebu City PIO
I via Renante Socia Lada