Usa ka Vietnamese national ug napulo’g usa (11) ka staff ang nadakpan atol sa entrapment operation nga gihimo sa Adora Beauty Clinic nga nahimutang sa Centro Maximo Building, Jakosalem Street, Barangay Cogon Central Ramos, Cebu City, niadtong Hulyo 19, 2025.
Ang operasyon gimandoan sa Regional Special Operations Unit 7 (RSOU7) ubos ni PLTCOL Wilfredo T. Taran Jr., uban sa suporta sa Regional Intelligence Division 7 ug City Mobile Force Company sa Cebu City Police Office. Gisugdan ang operasyon human madawat ang usa ka reklamo nga gisumite sa usa ka nabalakang sibilyan.
Sumala sa reklamo, ang klinika nagpatuman og mga beauty enhancement procedures bisan walay lisensyadong doktor o nars, ug wala usab nagbutyag sa mga brand sa ilang gigamit nga produkto. Usa ka police asset ang nagpaka-kliyente ug nangayo og lip filler treatment. Human kini buhaton sa usa ka staff nga wala’y medical license, misulod dayon ang mga operatiba ug nadakpan ang mga sangkot.
Nakumpiskar sa operasyon ang duha ka syringe nga adunay sulod nga lip filler substances, nagkalain-laing vials, ampules, tablets, capsules, mga syringe, usa ka RF intensity machine, ug usa ka Darme Shine Pro machine. Napakyas ang klinika sa pagpakita og dokumento nga nagapamatood nga sila’y akreditado sa FDA aron magpatuman og medical cosmetic services.
Ang mga suspetsado karon anaa sa kustodiya sa RSOU7 alang sa booking ug dokumentasyon. Gitun-an na ang pagsang-at og kaso batok kanila. Kung mapamatud-an nga sila nakalapas sa RA 9711 (FDA Act of 2009), mahimong masilotan sila og mapriso nga usa hangtod napulo ka tuig ug multa nga nagsugod sa ₱50,000 hangtod ₱500,000. Sa laing bahin, ang paglapas sa RA 2382 (Medical Act of 1959) mahimong masilotan og priso nga dili moubos sa usa ka tuig ug dili molapas sa lima ka tuig o multa.
Gipasidunggan ni PBGEN Redrico A. Maranan, Regional Director sa Police Regional Office 7, ang mga operatiba sa ilang paspas ug tinukmang lihok.
Matod pa nga ang maong operasyon nagpamatood sa ilang tinuoray nga paningkamot sa pagtubag sa mga reklamo sa katawhan, diin dili maglangan ang kapulisan sa pagsilot sa mga iligal nga kalihokan nga naghulga sa kahimsog sa publiko.
Source: CCPO
I via Renante Socia Lada