Usa ang patay ug unom ang naangol sa seryosong aksidente nga nahitabo mga ala-1:30 kagahapok sa hapon sa National Highway, Barangay Sabang, Danao City.
Ang namatay giila nga si Leonardo Gomonit Edoc, 59 anyos, lumolupyo sa Dawis, Barangay Tayud, Consolacion.
Si Edoc maoy nagmaneho sa motorsiklong nalambigit sa insidente ug giideklarar nga dead on arrival pag-abot sa Danao City Provincial Hospital.
Sa pikas bahin, ang unom ka naangol naglakip sa driver sa pasaheroang multicab nga si Eddie Maloloy-on Canales, 39 anyos, ug ang lima niya ka mga pasahero.
Napiit pa si Canales sulod sa multicab, giluwas dayon siya sa mga responders ug gidala sa ospital kauban ang iyang mga pasahero. Sumala sa imbestigasyon sa Danao City Police Station, ang aksidente nagsugod dihang ang sedan nga gimaneho ni Jocel Dela Peña Ibale, 30 anyos, taga Tayud, Consolacion, midasmag sa motorsiklo ni Edoc samtang nagpadulong kini pa-norte.
Tungod sa impact, nasarasay ang motorsiklo ug deretso natimingan sa miagi nga multicab ni Canales, hinungdan sa pagkahulog ni Edoc ngadto sa sementadong koral ug pag-angol sa uban.
I via Renante Socia Lada