Gibanhaw pag-usab sa Kapitolyo ang tinuig nga Children’s Congress, nga kataposang gihimo panahon pa ni kanhi Gobernador Hilario Davide III. Gipahigayon ang kalihokan kagahapong adlawa sa Capitol Social Hall, subay sa tema sa 2025 National Children’s Month: “OSAEC-CSAEM Wakasan: Kaligtasan at Karapatan ng Bata, Ipaglaban!”
Ang OSAEC ug CSAEM nagpasabot sa Online Sexual Abuse or Exploitation of Children ug Child Sexual Abuse or Exploitation Materials, nga gituohan nga usa sa pinakadakong hulga sa kabatan-onan karon ug gitutukan ubos sa Republic Act 11930.
Sumala ni Marirose Lopez, Officer-in-Charge sa Provincial Social Welfare and Development Office, ang Congress nagpalig-on sa tinguha sa Kapitolyo nga mapadako ang proteksyon sa mga bata ug magsiguro nga sila motubo nga luwas, respetado, ug protektado uban ang ilang katungod sa survival, development, protection, ug participation.
Gikan sa 24 ka local government units, 125 ka kabataan edad 3 hangtod 5 ang mitambong kauban ang ilang ginikanan, guardians, LGU staff ug daycare workers. Nalingaw ang mga bata sa lain-laing kalihokan sama sa draw-and-tell competition, singing ug folk dance contests.
Sa iyang pinakaunang State of the Children’s Address (SOCA), gibutyag ni Gobernador Pamela Baricuatro ang importansya sa pagtukod og lig-on, luwas, ug child-friendly nga komunidad pinaagi sa panaghiusa sa publiko ug pribadong sektor. Ang tumong mao ang pagpanalipod sa katungod sa mga bata ug pagtabang sa ilang mga pangandoy.
“My dear children, you are not just the future—you are Cebu’s joy, Cebu’s strength, and Cebu’s hope today,” matud pa ni Gob. Baricuatro.
Gipasalig sa gobernador ang pagpalig-on sa community-based child protection mechanisms, lakip ang mga programa batok sa online exploitation ug abuso. Plano usab niyang magtukod ug dugang daycare centers nga mosunod sa national standards, pag-establisar og child-friendly spaces, ug paghatag og mental health services sa daycare centers, eskwelahan, ug barangay level.
Dugang pa, iyang gisaad nga suportahan ang mas daghang programa sama sa immunization, nutrition, supplemental feeding, dental care ug advanced training para sa Child Development Workers.
Source: Cebu Province PIO
I via Renante Socia Lada