Usa ka aksidente ang nahitabo sa alas 8:30 sa buntag, Disyembre 5, 2024, sa National Highway, Barangay Pajo, Daanbantayan, nga misangpot sa pagkamatay sa usa ka motorista ug pag-angol sa iyang angkas.
Ang biktima nga si Gilbert Doble Arrabis Sr., sakay sa iyang Honda Wave nga kolor lunhaw, gi-deklarar nga dead on arrival. Ang iyang asawa, si Edelita Molejon Arrabis, usa ka konsehal sa Barangay Pajo, angkas sa motor ug dali nga gidala sa tambalanan sa dakbayan sa Sugbo.
Ang duha ka biktima mao ang ginikanan ni kanhi Vice Mayor ug kasamtangang Konsehal nga si Gilbert Arrabis Jr., nga lumulupyo sa Barangay Pajo.
Ang suspetsado sa maong insidente mao si Kyle Valente, 26 anyos, nga taga Sitio DAR, Barangay Bitoon, Daanbantayan. Si Valente nagmaneho sa usa ka Toyota Vios.
Matod ni Police Staff Sergeant George Chavez, ang mga biktima gikan sa ilang panimalay ug paingon na unta sa Pajo Barangay Hall. Samtang si Valente, gikan sa Barangay Poblacion, paingon sa Sitio DAR. Ang aksidente nahitabo dihang ang motor niliko ngadto sa wala nga bahin ug si Valente nagpadagan sa iyang sakyanan nga giingong kusog, hinungdan sa panagbangga.
Sa pagkakaron si Valente natanggong pa sa Daanbantayan Police Station ug mag-atubang kini og kasong Reckless Imprudence Resulting to Homicide with Serious Physical Injury and Damage to Property. (Renante Socia Lada)