Dead on the spot ang usa ka habal-habal driver ug naangol ang iyang pasahero human gidasmagan sa usa ka SUV.
Pasado alas 3:00 kagahapon, didto sa Barangay Tal-ot, Lungsod sa Barili , Probinsya sa Sugbo.
Ang biktima nga nakalas giila nga si Jose Unabia, hingkod ang panuigon, ug ang iyang angkas naila usab nga si Michelle Parba hingkod ang pangidaron, puros sila taga didto sa maong lungsod.
Naila usab ang suspetsado nga driver sa SUV Strada nga mao si Valentino Beltran, 72 anyos ang panuigon, residenti sa Barangay Binabag, Lungsod sa Pinamungajan, Sugbo.
Sa inbestigasyon nga gihimo sa Barili Police Station pinaagi ni PSG Ervin Alvizo ang inbestigador nga ang duha ka sakyanan nagbiya sa opposite direction nga nagbangga sa maong lugar.
Si Unabia naghatod kini og pasahero nga wala niya damha nga mao na diay kadto ang katapusan niya nga pagbiyahi.
Pamahayag sa suspetsado nga nawad-an siya og kontrol gumikan kay dangog ang karsada nga maoy hinungdan nga napunta sa pikas linya sa karsada ang gimaniho niini.
Sa kakusog sa impact nakabsan diha-diha dayon si Unabia ug naangol usab si Parba.
Sa pagkakaron padayong gitanggong ang suspetsado nga nakadasmag patay. (Renante Lada)