- Advertisement -
Nikutlo og tulo ka kinabuhi ang aksidenti sa kadalan human nag bangga ang wing van ug kotse. Ang aksidenti nahitabo didto sa National Highway sa Sitio Dancar, Brgy. Dunggoan, Siyudad sa Danao, pasado 1:00 kagahapon sa hapon, Pebrero 21, 2023.
Ang mga biktima nga nakalas giila sa Danao City Police Station nga sila si Erwin Bacalso Mondejar, 35 anyos, Imelda Mondejar, asawa, hingkod ang pangidaron ug ang anak niini nga si Erin Bless, 4 anyos ang panuigon, puros sila taga Macrohon, Southern Leyte.
Naluwas sa baba sa kamatayon ang kauban nila nga anak nga si Imer Betelquese, 7 anyos ang pangidaron.
Naila usab ang driver sa wing van nga mao si Nolin Batobalonos, 33 anyos, menyo ug mulupyo sa Maricaban, Sta. Fe, Isla sa Bantayan.
Sa imbestigasyon nga gihimo ni Police Master Sargeant Ronald Gomez ang imbestigador sa Danao City Police Station, nga ang duha ka mga sakyanan nag biyahi sa managlahi nga direksiyon ug sa pag abot na sa naasoy nga lugar nikawat sa linya ang gisakyan sa mga biktima nga maoy hinungdan nga nagkadasmag kini.
Dugang sa kapulisan nga gikan sa pag suroy-suroy ang mga biktima nga posibling nakatulog kini nga maoy hinungdan nga nakakawat sa pikas linya. Sa pagkakaron padayong gitanggong ang driver sa wing van samtang nagpadayon ang imbestigasyon.
(Renante Lada)
- Advertisement -