Nasikop ang usa sa mga Top 9 Most Wanted sa rehiyon nga may kalambigitan sa iligal nga drogas atol sa usa ka joint operation sa kapulisan niadtong Hulyo 11, 2025 sa Barangay Lamac, Pinamungajan.
Ang operasyon gipangulohan sa 2nd Provincial Mobile Force Company (PMFC), kauban ang Pinamungajan Municipal Police, Cebu Provincial Police Office, Provincial Intelligence Team, ug Regional Intelligence Unit 7. Ala 1:00 sa hapon ilang giserb ang warrant of arrest batok sa 41-anyos nga construction worker nga residente sa maong lugar.
Gipasanginlan ang suspetsado nga nakalapas sa Section 5, Article II sa RA 9165 o Comprehensive Dangerous Drugs Act of 2002, nga naghisgot sa pagpamaligya o pagpalusot sa iligal nga drogas.
Ang warrant gipagula sa Regional Trial Court Branch 29 sa Toledo City niadtong Setyembre 3, 2024. Walay girekomendar nga piyansa alang sa iyang kaso.
Matod ni PBGEN Redrico A. Maranan, Regional Director sa Police Regional Office 7, ang operasyon kabahin sa padayon nga kampanya aron limpyohan ang Central Visayas batok sa drogas.
Kini nga pagdakop nagpamatood sa intelihente ug tinud-anay nga paningkamot sa kapulisan sa tibuok rehiyon aron batukan ang iligal nga drogas ug ubang krimen.
Source: PRO7
I via Renante Socia Lada