Nadakpan sa kapulisan sa Toledo City ang usa ka lalaki nga nalista isip Top 7 Most Wanted Person sa probinsya ug Top 2 Most Wanted Person sa siyudad atol sa manhunt operation nga gihimo sa Barangay Daanlungsod, Toledo City, Cebu niadtong nakalabay nga mga adlaw.
Gidakop ang suspek pinaagi sa Warrant of Arrest tungod sa paglapas sa Section 5, Article II sa Republic Act 9165 o Comprehensive Dangerous Drugs Act of 2002. Ang maong warrant gi-isyu sa Regional Trial Court Branch 59 sa Toledo City niadtong Hulyo 18, 2025 ug walay gitakdang piyansa alang sa iyang temporaryong kagawasan.
Sumala sa imbestigasyon, dugay nang naglikay sa pagdakop ang suspek human makalingkawas atol sa buy-bust operation niadtong Hunyo 2025 diin nadakpan ang iyang kauban. Tungod niini, gi-isyuhan siya og warrant of arrest. Nasayran usab nga kaniadto na siyang nadakpan tungod sa mga kaso nga may kalabotan sa ilegal nga drogas ug naka-avail na og probation.
Gipasidunggan ni Cebu Police Provincial Office Director PCOL Abubakar Udang Mangelen Jr. ang mga pulis nga mipahigayon sa operasyon tungod sa ilang dedikasyon sa pagdakop sa mga wanted person. Matud pa niya, nagpakita kini sa lig-on nga paningkamot sa kapulisan sa pagpatuman sa balaod ug pagdala sa mga naglikay sa hustisya ngadto sa korte.
Nagpadayon usab ang CPPO sa pagpalig-on sa ilang kampanya batok sa kriminalidad ug mga wanted person aron masiguro ang kalinaw ug kaluwasan sa tibuok lalawigan sa Sugbo.
📸 CPPO
I via Renante Socia Lada