DAVAO CITY — Tulo ka mga Dabawenyo nga nakaabot sa edad nga 100 anyos ang gipasidunggan sa City Government of Davao pinaagi sa City Social Welfare and Development Office (CSWDO) isip pag-ila sa ilang taas nga kinabuhi ug sa ilang kontribusyon sa pamilya ug komunidad niadtong Hunyo 19, 2026.
Ang mga centenarians nga giila mao sila Candelaria Quilos sa Barangay Tugbok Proper, Joveta Tecson sa Barangay Vicente Hizon Sr., ug Maria Caiña sa Barangay 5-A.
Personal nga gihatud sa ilang mga panimalay ang plaque of recognition ug ang P100,000 nga cash incentive alang sa matag usa. Nanguna sa maong paghatag si Sebastian Duterte, kauban sila Lorenzo Villafuerte ug Danilo Dayanghirang, uban sa mga representante sa CSWDO.
Ang maong programa gipatuman subay sa City Ordinance No. 0727-21, Series of 2021, nga naghatag og P100,000 nga cash incentive ngadto sa mga kwalipikadong Dabawenyo nga nakaabot sa edad nga 100 anyos.
Gipadayag sa lokal nga panggamhanan nga ang maong inisyatiba usa ka paagi sa pagpasidungog sa mga senior citizens nga nakaamot sa pagpalambo sa ilang mga pamilya ug komunidad.(Camille Santos Naraga)(Source: (Mayor Sebastian “Baste” Duterte)