Ang Cebu Police Provincial Office ubos sa liderato ni Provincial Director PCOL Abubakar Udang Mangelen Jr. nagpadayon sa ilang hugot nga pagpangusog sa “Safer Cities Initiative” kagahapon June 19, 2026. Tungod niini, 598 ka mga tawo ang nadakpan sa lain-laing paglapas sa mga ordinansa sa tibuok lalawigan sa Cebu Province.
Sumala sa report sa kapulisan, miabot sa 236 ka operasyon ang gihimo sulod sa usa ka adlaw. Kini naglakip sa pagpugong sa mga paglapas sa balaod aron mapadayon ang kalinaw, disiplina, ug kahapsay sa komunidad.
Lakip sa mga violations nga natala mao ang 64 ka curfew violators, 49 ka mga nag inom sa pampublikong lugar, 35 ka walay sinina sa dalan, 26 ka nagpanigarilyo nga supak sa ordinansa, ug 5 ka naggamit og karaoke nga lapas na sa oras.
Aduna pud 437 ka traffic violations ug uban pang ordinansa violations. Nakatigum usab og ₱212,700 nga multa, samtang 171 ka tawo gipasidan-an ug gipahawa.
Giila sa Police Regional Office 7 ug sa mga local officials ang padayon nga paningkamot sa kapulisan sa pagpatuman sa balaod. Gipasabot nila nga ang “Safer Cities Initiative” dili lang pagpangdakop, kondili pagpahimulos sa disiplina ug kaluwasan sa komunidad.
Nagpasalig ang CPPO nga ipadayon nila ang mas hugot apan community-based nga pagpatuman sa balaod aron mas mapalambo ang kalinaw ug seguridad sa Cebu Province.
📸 CPPO
I via Renante Socia Lada