Nadakpan sa mga otoridad ang usa sa Top 7 Most Wanted Person sa municipal level sa usa ka operasyon niadtong Marso 20, 2026 sa City of Naga.
Ang suspek nailhan sa alias nga “Trompa,” 26 anyos, ulitawo ug residente sa Barangay Langtad. Nadakpan siya sulod sa Naga City Jail nga nahimutang sa Barangay Maghaway, Talisay City.
Gipahigayon ang operasyon sa City of Naga Police Station pinaagi sa ilang intelligence ug tracker teams. Ang pagdakop gibase sa warrant of arrest alang sa kasong robbery pinaagi sa pagpugos sa butang, nga adunay piyansa nga ₱36,000.
Base sa imbestigasyon, niadtong Septyembre 2025, misulod ang suspek sa usa ka tindahan sa mingaw nga lugar ug gikawat ang cellphone ug mga sigarilyo nga walay pagtugot sa tag-iya. Human sa insidente, misibat siya ug palayo sa maong lugar.
Nasuta usab nga kaniadto nadakpan na ang suspek niadtong Disyembre 2025 sa usa ka buy-bust operation may kalabotan sa ilegal nga drogas.
Gipahibalo sa Philippine National Police ang katungod sa suspek ubos sa balaod ug karon naa na siya sa kustodiya samtang naghulat sa pagbalhin sa korte.
Gidayeg ni PCOL. Abubakar Udang Mangelen Jr. ang kalampusan sa operasyon ug mipasalig nga padayon nilang pangitaon ug dakpon ang mga wanted person aron mapreserbar ang kalinaw ug kaluwasan sa komunidad.
Source: CPPO
I via Renante Socia Lada