Nabalhug na sa prisohan ang usa sa mga giilang Top 6 Most Wanted Person sa Sugbo, human kini madakpi sa mga sakop sa Waterfront Police Station 3, pinasikad sa mando sa korte alang sa kasong paghupot og dili lisensyadong armas.
Ang suspek, 35 anyos, nasikop niadtong Mayo 14, 2025, didto sa Legaspi Extension, Brgy. San Roque, ning dakbayan sa Sugbo, sa operasyon nga gipangulohan mismo ni PMAJ Mark Don Alfred Leanza, hepe sa maong estasyon.
Gisumiter ang Warrant of Arrest nga gi-isyu sa Regional Trial Court (RTC) Branch 57 niadtong Abril 25, 2025, ubos sa paglapas sa Republic Act 10591 o ang balaod batok sa ilegal nga pagpanag-iya og armas.
Ang akusado gipahubalo sa iyang mga legal nga katungod ug kasamtangang nagpabilin sa kustodiya sa Waterfront Police samtang nagpaabot sa dugang proseso legal.
PCOL Enrico E. Figueroa, Acting City Director sa Cebu City Police Office (CCPO), midayeg sa paspas ug epektibong lihok sa Waterfront Police Station 3, nga nagpamatuod sa ilang dedikasyon sa pagserbisyo sa katawhan.
Gihagit usab niya ang tanang unit nga padayon nga palig-onon ang kampanya batok sa kriminalidad ug pagpangdakop sa mga wanted persons, aron masiguro ang kalinaw ug kahapsay sa dakbayan.
Source: CCPO
I via Renante Socia Lada