Nasikop sa mga kapulisan ang usa ka lalaki nga Top 5 Most Wanted Person sa lebel probinsya ug Top 1 Most Wanted Person sa lebel munisipyo sa usa ka operasyon nga gipahigayon niadtong nakalabay na adlaw sa Barangay Triumpo, Carmen, Cebu.
Ang suspek nailhan sa alyas “Jay,” 25 anyos, ulitawo ug walay trabaho, residente sa maong barangay. Nadakpan siya pinaagi sa duha ka warrant of arrest nga gi-isyu sa Regional Trial Court Branch 9, Danao City.
Gipasakaan si alyas “Jay” og duha ka kaso sa rape ubos sa Article 266-A sa Revised Penal Code nga giusab pinaagi sa R.A. 8353, ug usa ka kaso sa acts of lasciviousness ubos sa Article 336 sa Revised Penal Code. Ang kaso sa rape dili mapiyansahan, samtang ang piyansa alang sa kaso sa acts of lasciviousness gitakda sa ₱36,000.
Ang operasyon gipangunahan sa Intelligence ug Warrant Server sa Danao City Police Station nga misangpot sa malampusong pagdakop sa suspek.
Sumala ni PCOL Abubakar Udang Mangelen Jr., Provincial Director sa Cebu Police Provincial Office, nagpakita kini sa lig-on nga paningkamot sa kapulisan sa pagdakop sa mga wanted persons, labi na kadtong adunay seryosong kaso. Giingon usab niya nga magpadayon ang ilang opisina sa pagpaningkamot aron masiguro nga mapreserbar ang kalinaw ug kahapsay sa probinsya sa Sugbo.
Nagpadayon ang Cebu Police Provincial Office sa pagpahugot sa kampanya batok sa mga wanted person subay sa direktiba sa Police Regional Office 7 aron mapadayon ang kalinaw ug kaluwasan sa tibuok probinsya.
Source: CPPO
I via Renante Socia Lada