Nibisita ang Commander sa Air Mobility Command sa Police Regional Office 7 (PRO7) niadtong Pebrero 27, 2026 sa kampo sa PRO7 sa Cebu City.
Si Major General Ramil G. Oloroso sa Philippine Air Force mainiton nga gidawat ni PRO7 Regional Director Police Brigadier General Redrico A. Maranan uban sa iyang mga opisyal ug personnel. Gihatagan usab siya og arrival honors isip timaan sa lig-on nga panagtinabangay ug respeto tali sa kapulisan ug militar.
Ang maong pagbisita kabahin sa iyang “exit call” samtang nangandam siya sa pagretiro sa serbisyo militar karong Marso 13, 2026, human sa daghang tuig nga pag-alagad sa nasod. Sa iyang mensahe, nagpasalamat si MGen Oloroso sa padayon nga suporta ug maayong koordinasyon sa PRO7, ilabi na sa seguridad, transportasyon, ug hiniusang operasyon sa tibuok Kabisay-an.
Gipasiugda usab niya ang kamahinungdanon sa lig-on nga koordinasyon tali sa PNP ug Air Force, labi na sa panahon sa kalamidad, humanitarian assistance, suporta sa law enforcement, ug pagmintinar sa kalinaw ug kahapsay.
Sa iyang bahin, gidayeg ni PBGen Maranan ang maayong liderato ni MGen Oloroso ug ang iyang dakong natampo sa nasod, ilabi na sa pagpalig-on sa panagtinabangay sa kapulisan ug militar sa Rehiyon 7.
Matud pa ni Maranan, dako ang pasalamat sa PRO7 sa dedikasyon nga serbisyo ni Oloroso ug sa pagpalambo sa lig-on nga panag-uban sa Philippine Air Force ug Philippine National Police. Gihangyo usab niya nga magpadayon ang kalampusan ni Oloroso bisan human sa iyang pagretiro.
Ang maong courtesy visit nagpakita sa padayon nga panaghiusa ug kooperasyon sa PNP ug Air Force alang sa kaluwasan sa publiko ug seguridad sa nasod, ilabi na sa Central Visayas.
Source: PRO7 PIO
I via Renante Socia Lada