Nadakpan ang usa ka 49 anyos nga panday human masakpi sa operasyon sa kapulisan nga nagpatuman og search warrant sa Sitio Malagaring, Barangay Basak, Badian niadtong Pebrero 24, 2026.
Gipahigayon ang operasyon sa mga operatiba sa Badian Municipal Police Station pinaagi sa search warrant nga gi-isyu sa Regional Trial Court Branch 96 tungod sa paglapas sa Republic Act 10591 o ang Comprehensive Firearms and Ammunition Regulation Act.
Ang nadakpan giila lang sa alyas nga “Gaga,” 49 anyos, minyo, ug residente sa maong lugar. Narekober gikan kaniya ang usa ka kalibre .38 nga revolver nga walay serial number, ug usa ka pouch bag nga gisudlan sa pusil. Ang tanang narekober nga ebidensya gimarkahan ug giimbentaryo sa lugar sa operasyon sa wala pa gidala sa estasyon sa pulis para sa hustong dokumentasyon.
Gidayeg ni CPPO Provincial Director PCOL Abubakar Mangelen Jr. ang mga operatiba sa malampusong pagpatuman sa search warrant. Matod niya, magpadayon ang kapulisan sa kampanya batok sa mga ilegal nga pusil aron masiguro ang kaluwasan sa komunidad.
Gipasakaan na og kaso ang suspetsado tungod sa paglapas sa Republic Act 10591.
Source: CPPO
I via Renante Socia Lada