Nasikop sa Police Regional Office 7 (PRO7) ang usa sa Top 5 Regional Most Wanted Person human sa hugot nga manhunt operation sa Tuburan, Cebu niadtong Pebrero 5, 2026.
Alas-2 sa hapon, gisilbihan og warrant of arrest sa kapulisan sa Tuburan Municipal Police Station ang suspek nga nailhan sa alyas “Ondo” didto sa Barangay Colonia, Tuburan. Ang kaso batok kaniya may kalabotan sa rape ug sexual assault (duha ka kaso) ug walay girekomendar nga piyansa.
Sa samang adlaw, alas-10:20 sa gabii, gisilbihan usab ang suspek og laing warrant of arrest may kalabotan sa illegal nga drogas, pinaagi sa tinabangay nga operasyon sa Regional Mobile Force Battalion 7, Lapu-Lapu City Police, ug Tuburan MPS. Kini usab walay piyansa.
Ang suspek giila usab kaniadto nga Top 4 Most Wanted sa probinsya ug Top 3 sa lungsod. Karon, siya gitanggong sa Tuburan MPS alang sa hustong dokumentasyon ug ipresentar sa korte.
Gipasalamatan ni PRO7 Regional Director PBGEN Redrico A. Maranan ang tanang kapulisan nga nalambigit sa operasyon. Matod pa niya, padayon ang PRO7 sa pagpaningkamot nga masikop ang tanang wanted persons aron mapadayon ang kalinaw ug kaluwasan sa Central Visayas.
Source: PRO7 PIO
I via Renante Socia Lada