Arestado ang usa ka 59 anyos nga vulcanizer atol sa gipatoman nga buy-bust operation sa mga operatiba sa CIDG Zamboanga del Norte PFU (lead unit) sa pakig-alayon sa Department of Energy (DOE) Mindanao Field Office uban sa Dapitan CPS ug ZNPIU,didto sa Purok Sanga, Barangay San Pedro, Dapitan City, Zamboanga del Norte, niadtong Pebrero 5, 2026, mga alas 4:40 ang takna sa hapon.
Ang maong operasyon miresulta sa pagkasikop sa 59 anyos nga lalaki, ulitawo, vulcanizer, nagpuyo sa operation site, gidakop tungod sa paglapas sa PD No. 1865 (Amending BP Blg. 33) ug RA No. 8479 (Downstream Oil Industry Deregulation Act of 1998) ubos sa TIP “TOLITS-ZDN-2001” CIG901-ZDN-2000.
Gidakop ang suspek tungod sa akto nga namaligya og mga produkto sa Liquid Fuel nga walay balido nga Certificate of Compliance (COC) aron mag-retail o magbaligya og mga produkto sa Liquid Petroleum ug dili usa ka giila o sertipikado nga HAULER FOR OWN USE aron maghatod o magdala sa likido nga gipalit gikan sa akreditado nga distributor o supplier.
Atol sa operasyon nakumpiska sa otoridad gikan sa dinakpan mao ang Tulo ka piraso sa walay sulod nga galon nga gimarkahan og RRB1 02/05/26, Usa ka piraso sa hose nga gigamit sa pagbalhin sa gasolina nga gimarkahan og RRB2 02/05/26, Pito ka piraso sa lain-laing mga galon nga adunay sulod nga kapin o kulang 10 ka litro matag usa nga gimarkahan og RRB3 hangtod RRB9 02/05/26, Usa ka piraso sa Blue Drum nga adunay sulod nga kapin o kulang 100 ka litro, nga gimarkahan og RRB10 02/05/26, Usa ka tinuod nga Php500.00 nga kwarta nga gigamit isip buy-bust money, ug 25 ka piraso sa Php500.00 nga boodle money, gimarkahan og RRB12 02/05/26.
Ang imbentaryo sa mga nakumpiska nga butang gihimo sa lugar sa pag-aresto ug gisaksihan sa suspek ug sa mga opisyal sa Barangay San Pedro.
Gipahibalo ang suspek sa hinungdan sa iyang pagkasikop ug gipahibalo sa iyang mga katungod sa Konstitusyon sa usa ka diyalekto nga iyang nasabtan ug ang suspek ug ang mga nakumpiska nga butang gidala sa opisina sa CIDG ZDN PFU alang sa dugang nga dokumentasyon ug hustong disposisyon.(MEDALYN U. BORJA)
Source: ZNPPO