Nadakpan sa Police Regional Office 7 (PRO7) ang usa ka Top 2 Regional Most Wanted Person sa Central Visayas atol sa operasyon niadtong Abril 11, 2026 sa Zamboanga del Sur.
Ang suspek nga nailhan lang sa alyas “Ronald,” nadakpan alas 9:50 sa buntag pinaagi sa hiniusang operasyon sa Police Station 1 sa Mandaue City Police Office (MCPO), CIDMU-MCPO, ug Aurora Municipal Police Station sa Zamboanga del Sur Police Provincial Office. Nahimong posible ang pagdakop human sa padayon nga intelligence monitoring ug maampingong case build-up nga mitultol sa eksaktong lokasyon sa suspek gawas sa Region 7.
Gibase ang pagdakop sa warrant of arrest alang sa kasong murder nga gi-isyu ni Hon. Joe Noel Codero Lawas, Presiding Judge sa Regional Trial Court Branch 84 sa Mandaue City, niadtong Marso 30, 2026. Walay piyansa nga gitakda alang sa maong kaso.
Sa pagkakaron, ang suspek naa na sa kustodiya sa Police Station 1, MCPO alang sa hustong disposisyon ug pagpresentar sa korte nga nag-isyu sa warrant.
Gidayeg ni PBGEN Redrico A. Maranan ang mga operatiba tungod sa ilang dedikasyon ug maayong koordinasyon sa operasyon. Matod niya, nagpakita kini sa lig-on nga paningkamot sa kapulisan sa pagdakop sa mga wanted person bisan pa man asa kini magtago.
Gipasalig usab sa PRO7 nga magpadayon ang ilang kampanya batok sa mga nag tago-tago nga kriminal aron masiguro nga matuman ang hustisya ug mapadayon ang kalinaw ug kahapsay sa komunidad.
Source: PRO7 PIO
I via Renante Socia Lada