Nadakpan sa usa ka joint law enforcement operation ang Top 1 Most Wanted Person sa municipal level ug Top 4 sa provincial level sa Alegria niadtong nakalabay nga adlaw.
Ang suspek nga giila lang sa alyas “John,” 39 anyos, usa ka construction worker ug residente sa Moalboal, nadakpan alas 5:30 sa hapon sa Barangay Sangi pinaagi sa Joint Tracker Team sa Moalboal Municipal Police Station uban ang Regional Intelligence Division 7.
Gibase ang pagdakop sa warrant of arrest batok sa suspek alang sa tulo (3) ka kaso sa paglapas sa Republic Act 10175 o Cybercrime Prevention Act of 2012, partikular sa cyber libel. Ang piyansa gitakda sa ₱144,000 matag kaso.
Sa pagkakaron, naa na sa kustodiya sa Moalboal Municipal Police Station ang suspek samtang gihulat ang pagturn-over niini sa hustong korte.
Si PCOL. Abubakar Udang Mangelen Jr., Provincial Director sa Cebu Police Provincial Office, mipasidungog sa mga operatiba tungod sa ilang dali ug hiniusang aksyon. Matod niya, nagpakita kini sa ilang lig-on nga paningkamot sa pagdakop sa mga wanted person ug pagpatuman sa hustisya sa probinsya sa Cebu.
Gipamatud-an usab sa mga otoridad nga ang warrant of arrest nakarehistro sa E-Warrant System, nga nakatabang sa mas paspas ug epektibong operasyon sa kapulisan batok sa mga mitago nga kriminal.
Source: CPPO
I via Renante Socia Lada