Kusog ug paspas ang pagtubag sa Cebu City Police Office (CCPO) ubos sa pagpangulo ni City Director PCOL GEORGE V YLANAN human nareport ang paglayas sa kinatibuk-ang 15 ka mga Children in Conflict with the Law (CICL) gikan sa Operation Second Chance Center sa Barangay Kalunasan, Cebu City sa Abril 11, 2026.
Matod sa report, nahitabo ang insidente mga alas 8:10 sa gabii ug nasuta sa mga otoridad mga alas 9:30 sa gabii. Diha-diha, mipahigayon og operasyon ang mga sakop sa Guadalupe Police Station 9 ubos sa pagpangulo ni PCPT VENSTINE BONTILAO, kaabag ang Mobile Patrol Unit ug SWAT, aron sa pagpangita ug pag-uli sa mga miikyas.
Tungod sa paspas nga aksyon sa kapulisan, walo (😎 ka CICL ang unang narekober ug nauli sa kustodiya. Sa alas 12:10 sa tungang gabii karong Abril 12, 2026, duha (2) pa ka CICL ang nadakpan ug gipabalik sa pasilidad. Sunod, mga alas 2:10 sa kadlawon, laing duha (2) ang narekober ug nauli usab sa kustodiya.
Sa alas 8:00 sa buntag sa samang adlaw, 12 na ka CICL ang total nga narekober sa operasyon. Dugang pa, alas 12:00 sa udto, usa (1) pa ang nadakpan, ug alas 2:30 sa hapon laing usa (1) usab ang nauli sa kustodiya. Sa karon, nagpabilin nga usa (1) na lang ka CICL ang padayon pang gipangita sa mga otoridad.
Gisiguro sa CCPO nga padayon ang ilang operasyon aron makompleto ang pagpangita sa tanang nakatakas ug aron mapadayon ang kalinaw ug kahapsay sa lugar. Nag-awhag usab ang kapulisan sa publiko nga motabang pinaagi sa pagreport sa bisan unsang impormasyon mahitungod sa nahabilin nga CICL pinaagi sa duol nga police station o emergency hotlines.
Ang CCPO mipadayag sa ilang padayon nga pasalig sa pagpanalipod sa publiko ug pagseguro sa kaluwasan sa komunidad pinaagi sa paspas ug desididong aksyon sa kapulisan.
Source: CCPO
I via Renante Socia Lada