Ang usa ka ordinaryong adlaw alang sa 15-anyos nga si Jayboy Magdadaro miusab sa iyang kinabuhi human siya giila isip bayani sa panahon sa kalamidad ug gihatagan og full scholarship tungod sa iyang kaisog ug kalooy sa isig katawo.
Sa dihang misangko ang tubig-baha tungod sa Bagyong “Tino” niadtong Nobyembre 4, 2025, wala magduha-duha si Jayboy nga tabangan ang iyang mga silingan sa Villa Lara, Liloan. Gamit lamang ang usa ka salbabida ug gamay nga bangka, iyang giluwas ang kapin 50 ka residente, lakip na ang mga bata, mabdos, ug mga tigulang, sulod sa pito ka oras nga pagresponde.
Tungod sa iyang pagkabayani, si Barangay Captain Atty. Daniel Francis Arguedo sa Mabolo personal nga naghatag kaniya og full scholarship nga naglakip sa tanan nga gastohon sa eskwelahan ug ₱3,000 nga allowance matag bulan.
Matod ni Arguedo, ang maong pag-ila dili lamang usa ka ganti apan simbolo sa paglaom ug inspirasyon nga bisan ang kabataan, kung adunay kaisog ug kasingkasing nga motabang, mahimong instrumento sa kaluwasan sa uban.
Karon, si Jayboy usa na sa mga simbolo sa kabatan-onang Sugboanon nga adunay kaisog, kalooy, ug paglaom, nga nagpahinumdum nga ang tinuod nga bayani, dili kinahanglan nga hamtong — basta adunay kasingkasing nga buotan ug andam motabang sa panahon sa kalisdanan.
I via Renante Socia Lada