Nagpadayon ang Probinsya sa Sugbo sa ilang paningkamot nga mapalambo ang kaluwasan sa panglawas sa katawhan pinaagi sa pinakabag-ong distribusyon sa Leptospirosis prophylaxis ug ubang mga tambal ngadto sa lain-laing mga lungsod ug ospital sa probinsya.
Lakip sa mga nakadawat sa maong ayuda mao ang mga siyudad ug lungsod sa Consolacion, Liloan, Compostela, Danao, Catmon, Borbon, Tuburan, Balamban, Talisay, ug Toledo, apil na usab ang CPH-Danao, Sogod Hospital, Daanbantayan District Hospital, Tuburan Hospital, ug Balamban Hospital.
Ang maong kalihukan kabahin sa disease prevention ug disaster response initiatives sa probinsya, ilabi na human sa mga kalamidad nga nakaapekto sa rehiyon, aron masiguro nga aduna gihapon og akses sa medikal nga serbisyo ug suplay ang mga Sugboanon.
Gipasalamatan sa probinsya ang Courage Cebu, Majesty Pharmacy, Mercury Drug Corporation Foundation, ug si Senador Bam Aquino sa ilang tabang sa pagdugang sa suplay alang sa maong distribusyon.
Source: Cebu Province PIO
I via Renante Socia Lada