Usa ka 15-anyos nga Grade 10 student ang napalgang wala nay kinabuhi sulod sa ilang pinuy-anan sa Barangay Marigondon, sayo sa buntag niadtong Hunyo 23, 2025.
Sumala sa hepe sa impormasyon sa Lapu-Lapu City Police Office (LCPO) nga si Police Lt. Col. Christian Torres, pasado alas 5:30 sa buntag, nadiskubrehan sa mga ginikanan ang biktima nga nagbuy-od sa salog ug nagligo sa kaugalingong dugo. Duol sa lawas sa menor de edad, nakit-an ang usa ka kalibre .45 nga pistola nga gituohang rehistrado sa iyang amahan nga usa ka aktibong miyembro sa Philippine National Police (PNP) nga nadestino sa LCPO, PRO-7.
Sa pagsusi sa medical team sa Lapu-Lapu City Health Office, gideklarar nga patay na ang biktima sa mismong lugar sa insidente.
Segon ni Torres, ang amahan sa biktima nga usa ka Police Master Sergeant, misaysay nga hilomon ang iyang anak apan dali ra masuko. Sa wala pa ang insidente, giingong gimaymayan sa inahan ang bata tungod sa kanunay nga pag-uli og kadlawon bisan pa nga sayo ang klase sa buntag.
Matod sa amahan nga gibutang ang armas sa usa ka drawer nga adunay yawe, apan nakuha kini sa bata human kini mopugos og abli. Posible usab nga nakat-on ang biktima sa paggamit sa pusil pinaagi sa social media, diin dali ra karon makakita og mga instructional videos ang kabatan-onan.
Padayon pa karon ang imbestigasyon sa kapulisan arin matino kung wala ba kini foul play.
I via Renante Socia Lada