Nakadawat og ₱2.85 milyong donasyon ang Kapitolyo sa Sugbo gikan sa Tatler Philippines alang sa tabang-panglawas ug rehabilitasyon sa mga komunidad sa Cebu nga naapektuhan sa bagyo.
Ang donasyon gipadala pinaagi sa Mariquita Salimbangon Yeung (MSY) Charitable Foundation Inc. ug personal nga gitunol ni Dame Mariquita Salimbangon Yeung, founder ug chairperson sa maong foundation, atol sa usa ka seremonya sa Opisina sa Gobernador niadtong Enero 22, 2026.
Mipasalamat si Gov. Baricuatro sa Tatler Philippines, kang Dame Yeung, ug sa MSY Foundation, ug miingon nga ang kwarta gamiton sa relief ug rehabilitasyon sa mga lugar sa Cebu nga nadaut sa bagyo ug uban pang kalamidad.
Matod pa sa gobernador, niadtong Nobyembre sa miaging tuig, miadto siya sa Manila isip representante sa Probinsya sa Cebu human giimbitar sa Tatler Philippines, diin nasiguro ang maong pledge nga ₱2.85 milyon para sa tabang sa mga biktima sa kalamidad.
Ang kantidad nakuha pinaagi sa charity auction sa usa ka painting nga Casares (Pueblo Andalucia) nga gihimo aron makatabang sa Cebu. Ang pondo giatiman ug gi-facilitate sa MSY Foundation alang sa padayong recovery efforts sa probinsya.
Miingon si Gov. Baricuatro nga dako kaayong tabang ang maong donasyon alang sa mga biktima sa Bagyong Tino sa Cebu, ug iyang gipasalamatan ang tanang pribadong sektor nga mitabang.
Gipasidunggan usab niya ang Tatler Philippines tungod sa ilang pagtagad sa kahimtangan sa Cebu ug sa ilang padayong suporta sa probinsya.
Source: Cebu Province PIO
I via Renante Socia Lada