Nadakpan sa kapulisan ang usa ka negosyante nga nagbaligya og smuggled nga sigarilyo atol sa usa ka joint operation sa Mandaue City, sumala sa Police Regional Office 7 (PRO7). Ang narekober nga sigarilyo gibanabana nga nagkantidad og kapin ₱5.28 milyones.
Gipangulohan ang operasyon sa City Intelligence Unit sa Mandaue City Police Office (MCPO) uban sa tabang sa Bureau of Customs, CIDG-7, Regional Intelligence Division 7, City Mobile Force Company, Police Station 5, MCPO, ug National Bureau of Investigation–Mandaue.
Nahimo ang operasyon alas 3:53 sa hapon niadtong Enero 23, 2026, ubos sa Republic Act 10863 o ang Customs Modernization and Tariff Act. Dinhi nadakpan ang suspek nga nailhan sa alyas “Hamed,” 52 anyos, lumad sa Sta. Catalina, Zamboanga City ug kasamtangang nagpuyo sa Barangay Looc, Mandaue City.
Nasakpan ang suspek samtang nagbaligya og smuggled nga sigarilyo sa usa ka police poseur-buyer. Narekober gikan kaniya ang usa ka kahon nga adunay 50 reams sa Alpha cigarettes, 1,396 reams sa King Bravo, 150 reams sa Famous, ug 435 reams sa Alpha cigarettes, lakip ang ₱15,000 nga buy-bust money.
Sa kinatibuk-an, 2,031 ka reams sa smuggled nga sigarilyo ang nakuha sa kapulisan, nga gibanabana og kantidad nga ₱5,280,600. Gidala ang suspek ug ang tanang ebidensya sa CIU, MCPO alang sa hustong legal nga proseso.
Matod pa ni PBGEN Redrico A. Maranan, Regional Director sa PRO7, dili gyud tugutan ang pagbaligya ug pag-apod-apod og smuggled nga sigarilyo.
Giingnan niya ang tanang negosyante nga mosunod sa balaod ug regulasyon sa customs tungod kay magpadayon ang PRO7 sa pagpanlimbasog batok sa iligal nga patigayon aron mapanalipdan ang komunidad ug ang legal nga negosyo sa Central Visayas.
Source: PRO7 PIO
I via Renante Socia Lada