Miapil ang Cebu Provincial Government, pinaagi sa Cebu Provincial Youth Development Office (CPYDO), sa pagselebrar sa National Arts Month 2026 uban sa National Commission for Culture and the Arts (NCCA).
Alang sa Cebu, adunay kaugalingong tema ang selebrasyon nga nagpasidungog sa pagkamamugnaon sa mga Sugboanon: “Ani sa Alampat: Kamatuoran, Kadasig, ug Paghig-usa.”
Matod pa sa CPYDO, ang arte gihulagway isip usa ka “ani” nga naggikan sa kamatuoran, gipalig-on sa kaisog, ug nagkahiusa sa komunidad.
Gipakita niini ang talento sa mga Cebuano artists nga naggikan sa ilang kultura ug pagkatawo samtang nag-atubang sa modernong panahon.
Ang selebrasyon adunay tulo ka nag-unang tema. Una ang Kamatuoran, diin ipakita ang tinuod nga istorya ug kinabuhi sa mga Sugboanon pinaagi sa digital art, illustration, ug digital storytelling sama sa reels.
Ikaduha ang Kadasig, nga nagtan-aw sa arte isip tingog ug kaisog sa kabatan-onan. Kini ipakita sa Fusion Dance Competition nga naghiusa sa tradisyonal nga sayaw sa Cebu ug modernong estilo.
Ikatulo ang Paghig-usa, nga nagpasabot sa arte isip tinabangay ug bayanihan. Kini matapos sa Sustainable Fashion ug Wearable Art Competition, fashion show finals, ug usa ka guest designer showcase.
Gidapit usab ang publiko sa usa ka online orientation meeting bahin sa Cebu Arts Month karong Enero 25, 2026 alas 6:00 sa gabii pinaagi sa Zoom, aron mahibal-an ang tanang detalye sa mga kalihokan.
Matod sa CPYDO, padayon nilang suportahan ang mga artist ug kabatan-onan sa Cebu aron mapadayon ang pag-ani sa arte nga tinuod, kaisog, ug nagkahiusa.
Source: Cebu Province PIO
I via Renante Socia Lada