Nakabsan sa kinabuhi ang usa ka Barangay Tanod sa Barangay Inayagan, Dakbayan sa Naga, human kini nadasmagan sa usa ka Ford Everest.
Ang biktima, giila sa Minglanilla Police Station na mao si Priscillano Jordan Omalay, 59-anyis, usa ka Barangay Tanod nga taga Purok Nanay Abyang 1, Barangay Inayagan, Dakbayan sa Naga, nagbantay sa daplin sa kalsada sa tunga-tunga sa National Highway sa Inayagan, sa dihang nahitabo ang insidente.
Base sa imbestigasyon, mga alas 3 sa kadlawon, Disyembre 22, 2024, samtang nag-duty si Omalay sa atubangan sa Holy Rosary Parish sa Barangay Tungkop, Minglanilla, kalit siyang nadasmagan sa usa ka Ford Everest nga gimaneho ni alyas Gerald, taga Dakbayan sa Talisay.
Bisan pa man nga nadasmagan si Omalay, ang drayber misutoy sa pagdagan ug milikay gikan sa lugar pero wala nagdugay nasikop kini sa kapulisan.
Nasayran nga ang suspetsado nga drayber ubos sa ilimnong makahubog atol sa iyang pagmaniho sa maong sakyanan.
Si Omalay dali nga gidala sa Minglanilla Rescue Team ngadto sa Cebu South General Hospital, apan nabugtuan gyud kini sa kinabuhi.
Hinuon wala na abtan og 24 oras gibuhian ang suspetsado human nagkasabot ang duha ka habig. (Renante Socia Lada)