Nimando karon si Cebu City Acting Mayor Raymond Alvin Garcia nga pa imbestigaran ang wala nahuman nga edepisyo sa Guba Community Hospital sa bukirang barangay sa dakbayan sa Sugbo nga unom na ka tuig gisugdan pagtrabaho nga hangtod karon wala gihapon nahuman.
Kana maoy pamahayag ni Acting Mayor Garcia kagahapong adlawa, Hunyo 1, 2024, atol sa iyang kinalit nga pagbisita sa maong tambalanan.
“Nindot gyud kaayo ang iyang perspective, unya mahug nga modern gyud kaayo nga hospital, pero sayang kaayo nga 2019 nasugdan, six years after wala pa nahuman,” segon ni Acting Mayor Garcia.
Mopatawag karong adlaw nga Lunes, Hunyo 3, 2024, si Acting Mayor Garcia ni Dr. Peter Mancao, ang labaw sa Cebu City Medical Center, ug si Dr. Daisy Villa, ang labaw sa City Health Department, aron pangayoan og katin-awan nganong nalangay ang pagkahuman sa maong tambalanan.
“And if it needs more investigation, atong ipatawag ang Department of Health kay ilaha man ning budget, sila say nag-implement niini. Kay usik kaayo. Nindot kaayo nga lugar, nindot kaayo ang ilang edepisyo, ang ilang building (sumala sa perspective drawing), pero wala gyud ta makatagamtam sa maong ospital kay tungod nadilatar,” pagtataw ni Acting Mayor Garcia.
“So, I want to find out kung unsa gyuy nahitabo,” dugang niya.
Sa nasayran nga ang Guba Community Hospital “extension” sa CCMC gituyo sa pagtukod aron ang mga pasyenti nga nagluyo sa bukirang bahi dili na mulugsin aron magpatambal.
Aduna kini pundo nga P15.79 milyon nga gipomduhan sa Department of Health (DOH-7).
Nahibaw-an nga ang Golden Compass Builders, Inc. maoy kontrator niini. (Renante Socia Lada)
(Source: Cebu City PIO)