Mibisita si Taguig City Mayor Lani Cayetano sa Cebu, sa miaging adlaw aron personal nga itunol ang ₱10 milyon nga pinansyal nga tabang ngadto sa probinsya nga naapektuhan sa kusog nga linog niadtong 2025.
Ang maong tabang gikan sa Taguig City ipanghatag sa upat ka lungsod sa amihanang Cebu nga grabeng naigo sa magnitude 6.9 nga linog niadtong Septyembre 30, 2025. Matag lungsod makadawat og ₱2.5 milyon aron makatabang sa ilang pagbangon.
Gidawat ni Gob. Pamela Baricuatro ang donasyon ug mipadayag sa iyang dakong pasalamat sa maong tabang. Matud niya, dako kini og ikatabang sa mga apektadong komunidad sa pagpadayon sa ilang rehabilitasyon ug pag-ayo sa mga nadaot nga imprastruktura.
Gipasabot usab sa gobernador nga ang maong tabang nagpakita sa lig-on nga panaghigalaay ug kooperasyon tali sa Cebu ug Taguig, labi na sa panahon sa kalamidad.
Dugang niya, ang maong suporta usa ka maayong ehemplo sa panaghiusa sa mga lokal nga gobyerno aron mas paspas makabangon ang mga lugar nga naapektuhan sa mga kalamidad.
Source: Cebu Province PIO
I via Renante Socia Lada