Mitambong si Cebu Gob. Pamela Baricuatro sa general assembly sa Cluster One Federation of Irrigators Inc. diin iyang gipaminaw ang mga kabalaka ug panginahanglan sa mga mag-uuma aron mapalig-on ang food security sa probinsya.
Ang kalihokan gihimo niadtong Abril 17 sa barangay Can-asujan sa Carcar City ug gitambongan sa 185 ka farmer-members. Dinhi gipadayag sa mga mag-uuma ang ilang panginahanglan sama sa tractor alang sa humayan ug mga programa aron mapalambo ang merkado sa mga utanon ug masiguro ang patas nga presyo.
Sa iyang mensahe, gipasalig ni Gob. Baricuatro ang padayon nga suporta sa Cebu Provincial Government alang sa mga mag-uuma. Iyang gipasiugda nga pareho nilang tumong ang pagpalig-on sa produksyon sa pagkaon alang sa mga Cebuano.
Gipaila usab niya ang Agrilink program sa probinsya nga mopalit sa sobrang ani sa mga mag-uuma ug ibaligya kini pinaagi sa mobile Agrilink van aron dili mausik ang produkto ug makatabang sa kita sa mga mag-uuma.
Gimandoan usab sa gobernador ang Provincial Agriculturist nga makig-coordinate sa grupo bahin sa ilang hangyo nga tractor, aron matabangan sila sa pagpalambo sa ilang panguma ug mas mapadali ang ilang trabaho.
Source: Cebu Province PIO
I via Renante Socia Lada