Gisusi sa mga opisyal sa Kapitolyo ang Cebu Provincial Hospital Carcar aron tan-awon ang padayon nga pagpaayo sa pasilidad, ilabi na sa trauma care ug kahimtang sa pag-atiman sa mga pasyente. Tumong niini nga mapalapad ang serbisyo sa mga espesyalista alang sa mga residente sa habagatang bahin sa Cebu.
Gipangunahan ang inspeksyon ni Dr. Nikki Catalan, Capitol Health Consultant nga miingon nga ang ospital usa ka importante nga referral center alang sa mga lungsod gikan Sibonga hangtod Dumanjug. Ang maong lakang kabahin sa reporma sa administrasyon ni Gob. Pamela Baricuatro aron mapauswag ang serbisyo sa panglawas sa probinsya.
Apil sa gi-improve ang trauma system sa ospital, diin gipalig-on ang emergency room pinaagi sa suporta sa SugBUCAS ug pakigtambayayong sa Vicente Sotto Memorial Medical Center. Tumong niini nga mapaspasan ug mapalambo ang pag-atiman sa mga pasyente nga naaksidente o naa sa kritikal nga kahimtang.
Dugang pa, nadugangan og duha ka espesyalista ang ospital—usa ka eye doctor ug usa ka ENT specialist, aron mas daghang serbisyo ang mahatag sa publiko. Gilauman nga makatabang kini aron dili na kinahanglan moadto pa sa layo ang mga pasyente ug mas sayo silang madayagnos ug matambalan.
Padayon usab ang pagpaayo sa imprastruktura sa ospital, lakip na ang pag-organisar sa emergency room aron mas klaro ang pag-atiman sa lain-laing kaso ug ang plano sa paghimo og program room alang sa sayong pag-detect sa breast cancer. Gisusi usab ang pag-ayo sa outpatient department aron mas luwas ug komportable ang pasilidad alang sa tanan.
Source: Cebu Province PIO
I via Renante Socia Lada