Nadakpan sa Compostela Police Station ang usa ka construction worker nga suspetsado sa pagtigbas-patay sa iyang foreman sa Purok 7, Barangay Dapdap, Compostela, Cebu, kagahapon sa buntag, Pebrero 1, 2025.
Ang suspet nailhan nga si Julito Morales Camanse, 43-anyos, taga-Barangay Licos, Danao City, Sugbo.
Ang biktima mao si Rodel Bejoc Solano, usa ka foreman sa ilang konstruksyon. Sumala ni PCapt Lino Tryss Galvan, hepe sa Compostela Police, pangabugho ang gituohang motibo sa krimen. Nahibaw-an sa suspek nga nagpadayon ang relasyon sa iyang asawa ug sa biktima.
Mahinumduman nga sa wala pa nahitabo ang krimin nag inum pa si Solano sa usa ka tindahan ug sa pag uli na niini nga adunay babaye nga gihatod gi atangan kini ug gitigbas sa liog na maoy hinungdan sa iyang kamatayon.
Karon, ang suspek gitanggong na sa selda samtang nagpaabot sa kasong murder nga ipasaka batok kaniya. (Renante Socia Lada)