Usa ka lola nga napalgang patay nga nabuwag ang ulo sa lawas niini sa bukirang dapit sa Barangay Candabong, Dumanjug, Cebu, pasado alas 11 sa buntag, Sabado, Pebrero 1, 2025.
Ang biktima giila sa Dumanjug Police Station na mao si Miguela Pocong Barino, 83- anyos, residente sa maong lugar.
Sumala ni Police Captain Eden Rex Baguio, hepe sa Dumanjug Police Station, usa ka 9-anyos nga apo sa tuhod sa biktima ang nakadiskubre sa iyang patayng lawas atol sa ilang pagbisita sa panimalay sa ilang apohan, nga nag-inusara na lamang pagpuyo .
Sa inisyal nga imbestigasyon, nakita ang lawas sa biktima nagbuy-od sa gawas sa pultahan, samtang ang iyang ulo nahulog sa ubos sa hagdanan. Tungod niini, dali nga mipahibalo ang kapulisan sa mga personahe sa Scene of the Crime Operatives (SOCO) aron masusi ang panghitabo.
Nasuta nga kapin na sa 48 oras ang pagkamatay sa biktima tungod sa grabeng pagdekompos sa iyang lawas.
Gituhuan sa kapulisan nga posibling gi atake kini og gihilabtan sa mananap ang lawas na maoy hinungdan nga nag buwag na ang ulo ug lawas.
Gisalikway sa kapulisan ang unang nanggawas nga taho nga gilungguan kini sa liog apan ila gihapon kini ipaubos sa autopsy aron masuta kung unsay gikamatyan sa biktima (Renante Socia Lada)Â