Mikabat sa 499 ka mga tawo ang nadakpan tungod sa paglapas sa nagkalainlaing lokal nga ordinansa atol sa gipakusog nga operasyon sa kapulisan ubos sa Safer Cities Initiative kagahapon Hunyo 18, 2026.
Sumala sa Cebu Police Provincial Office (CPPO), 240 ka operasyon ang gipahigayon sa tibuok probinsiya ubos sa pagmando ni Provincial Director PCOL Abubakar Udang Mangelen Jr. aron mapadayon ang kalinaw ug kahapsay sa komunidad.
Sa talaan sa kapulisan, 54 ang nadakpan tungod sa pag-inom og ilimnong makahubog sa publiko, 26 tungod sa pagpanigarilyo sa publikong lugar, 10 ka tawo nga naglakaw sa publiko nga walay sapot sa ibabaw nga lawas, 42 ka nakalapas sa curfew, usa ka kaso sa paglapas sa karaoke ordinance, 359 ka paglapas sa traffic ordinances, ug pito ka uban pang lokal nga ordinansa.
Gikan sa kinatibuk-ang 499 ka nadakpan, 359 ang gipamultahan ug gihatagan og citation ticket samtang 140 ang gipahimangnoan ug gibuhian. Mikabat usab sa ₱128,950 ang nakolektang multa gikan sa operasyon.
Ang Talisay City Police Station maoy adunay pinakadaghang nadakpan nga 82, gisundan sa Consolacion Municipal Police Station nga adunay 58, Naga City Police Station nga adunay 39, ug ang Danao City Police Station ug Daanbantayan Municipal Police Station nga adunay tag-31 ka nadakpan.
Matud ni Police Regional Office 7 Director PBGEN Arnold Evangelista Abad, ang kampanya usa ka paagi aron mapugngan ang gagmayng kalapasan nga mahimong mosangpot sa mas seryosong krimen.
Samtang, gipasalamatan ni Cebu Governor Pamela Baricuatro ang panaghiusa sa lokal nga kagamhanan ug kapolisan sa pagmintinar sa luwas ug malinawon nga mga komunidad sa probinsiya.
Gipasabot usab ni PCOL Mangelen nga ipadayon ug palig-onon pa sa CPPO ang ilang mga operasyon ug pakig-alayon sa komunidad aron masiguro ang kalinaw, kahapsay, ug kaluwasan sa tanang lungsod ug siyudad sa Cebu.
📸 CPPO
I via Renante Socia Lada