Nasikop sa mga otoridad ang usa ka 17-anyos nga lalaki nga giilang si alias “Ar Ar,” human sa gihimong operasyon sa kapulisan niadtong Hulyo 6, 2025 sa Purok Shooting Star, Barangay Babag.
Ang suspetsado giila nga Top 7 Most Wanted Person sa tibuok rehiyon. Ang operasyon gipangulohan sa mga intelligence personnel sa Police Station 3 sa Lapu-Lapu City Police Office (LCPO), pinasikad sa warrant of arrest nga gipagawas sa Regional Trial Court Branch 70 sa Lapu-Lapu City niadtong Hulyo 4, 2025. Si “Ar Ar” Nag-atubang sa lima ka kaso sa statutory rape nga adunay kinatibuk-ang piyansa nga ₱600,000.
Karon, si alias “Ar Ar” anaa sa kustodiya sa LCPO samtang gipaabot ang iyang presentasyon sa korte aron atubangon ang mga kaso batok kaniya.
Ang statutory rape giisip nga usa sa mga heinous crimes, nga silotan og reclusion perpetua o pagkabilanggo sulod sa 20 hangtod 40 ka tuig nga walay parol.
Gipasabot ni Police Colonel Dyan V. Agustin, City Director sa LCPO, nga ang dali nga pagdakop sa suspetsado timaan sa ilang seryosong pagpatuman sa kampanya kontra kriminalidad.
Dugang pa niya, kini nga kalampusan usa ka tubag sa direktiba sa Chief PNP sa pagpalig-on sa seguridad ug hustisya sa komunidad.
via Renante Socia Lada