Nagpahigayon og usa ka planadong panagtigom si Cebu City Mayor Nestor Archival uban sa bag-ong napili nga mga opisyales ug mga pangulo sa departamento sa Cebu City Social Hall. Ang maong kalihokan gipangulohan sa Department of the Interior and Local Government (DILG)–Cebu City isip suporta sa maayong lokal nga pamunuan ug tulay sa liderato.
Sa iyang mensahe, giklaro ni Mayor Archival nga ang umaabot nga tulo ka tuig sa iyang termino magpasiugda sa kinatibuk-an, malinawon ug matinud-anong pagdumala. Una niyang giila nga prayoridad ang paghuman sa Cebu City Medical Center (CCMC), usa ka dugay nang gihandum nga proyekto sa sektor sa panglawas sa mga Sugbuanon.
Gihisgutan usab sa mayor ang kahimtang sa pagkaon sa siyudad, diin kasagaran niini gikan pa sa gawas sa syudad. Isip solusyon, iyang gisuportahan ang pagtukod og mga pilotong demo farms sa north ug south districts ug pagpalambo sa irrigation systems aron masuportahan ang lokal nga produksyon sa pagkaon.
Sa edukasyon, gitutukan ni Archival ang pagpalig-on sa 24/7 public library program, ilabi na sa ikaduhang andana sa Cebu City Public Library aron mas maka-akomodar sa mga magtutungha. Sa serbisyo publiko, iyang giuna ang digitalisasyon ug konektibidad tali sa mga departamento aron mapadali ang serbisyo sa katawhan.
Alang sa kalinaw ug seguridad, AI-powered CCTV ang plano sa mayor ipangbutang sa dagkong lugar. Sa palibot, buot sa mayor nga ipatuman ang solar ordinance pinaagi sa paghimo og implementasyon nga tukma sa mga pampublikong building sa syudad, samtang palig-onon usab ang tree-planting campaign.
Iyang gisaad usab nga palig-onon ang programa sa panimalay ug relokasyon, pinaagi sa kooperasyon sa City Engineering Office aron mahibal-an ang mga angay nga luna sa relokasyon, pagtutok sa bahaon nga lugar, ug drainage system plan.
Sa trapiko, gitutukan ni Archival ang kahuot sa trapiko sa Talamban, Salinas Drive, Lahug ug sa habagatan nga bahin sa siyudad. Giplano usab niya ang pagpalig-on sa revenue collection pinaagi sa kooperasyon sa City Assessor ug Treasurer’s Office, ug gusto niyang mapadali ang proseso sa business permit renewal ngadto sa usa ka adlaw ra nga transaksyon.
Sa pagtapos sa iyang pamulong, gi-awhag sa mayor ang tanan sa kooperasyon.
Si Vice Mayor Tomas Osmeña mitambong usab ug mipahinungod sa kahinungdanon sa pag-ila sa problema ug pagtrabaho sa tinuod nga solusyon.
Source: Cebu City PIO
I via Renante Socia Lada