Tanggong sa prisohan ang usa ka indibidwal nga nalutsan og Warrant of Arrest for Qualified Theft of Coconut kon kasong pagpangawat og Lubi, pinaagi sa gipahigayon nga Implementasyon sa Pag-serbe og Warrant of Arrest, pinaagi sa mga personahe sa Dapitan City Police Station (DCPS), nga atua nahimotang sa Barangay Dawo sa nasangpit nga Dakbayan, niadtong nakalabay’ng adlaw Hulyo 3, 2025.
Giila sa Dapitan Pnp ang dinakpan sa Alyas nga Toto, hingkod ang pangidaron ug lumulupyo sa Barangay San Nicolas, Dakbayan sa Dapitan, ning Probinsiya sa Zamboanga Del Norte, diin ang nasangpit nga dinakpan, nasikop pinasikad sa Warrant of Arrest nga giisyu gikan sa 9th Judicial Region, Branch 8, Dipolog city, Zamboanga Del Norte.
Hinuon, gitugotan sa korte nga makaangkon og temporaryong kagawasan ang suspetsado, kon kini makatunol og kantidad nga Php10,000.00 alang na sa iyang temporaryong kagawasan, samtang ang dinakpan atua na ubos sa kustodiya sa Dapitan City Custodial Facility, mentras giasikaso pa ang pagbalik sa Warrant of Arrest ngadto sa korte nga nag-isyu niini.(Julius Esmade)