Nadakpan sa kapulisan ang mga suspek nga nalambigit sa brutal nga pagpatay sa usa ka 46-anyos nga trabahante sa Sitio Lobres, Barangay Pung-ol Sibugay, Cebu City, human kini mawala ug nakit-an na lang nga patay ug gilubong. Naluwas usab ang usa ka 15-anyos nga minor nga naapil sa insidente.
Sumala sa imbestigasyon sa Malubog Police Station 12, pinangulohan ni PCPT Kentbel Ceasar V. Parcon, nadiskubri-an ang lawas sa biktima kaniadtong Agosto 27, 2025, nga gibutang sa sako ug gilubong sa usa ka farm. Giila kini sa iyang igsuon nga residente ug caretaker sa maong lugar.
Base sa pamahayag sa mga nadakpan, namatay ang biktima human gi gulgol sa nag-unang suspek gamit ang kutsilyo atol sa ilim niadtong Agosto 24. Ang uban nga tawo nga naa sa lugar mitug-an nga mitabang kay gihadlok nga patyon.
Human sa sunod-sunod nga operasyon, nadakpan ang tulo ka mga lalaki ug naluwas ang minor nga giingong naapil sa pagtabang sa pagpanago sa krimen. Silang tanan nagtudlo sa nag-unang suspek isip mipatay sa biktima.
Nakasibat pa ang suspek sa maong lugar, apan pinaagi sa coordinated operation sa Malubog Police Station 12 ug Police Station 6, nga giya ni PCPT Giann Karlo M. Reyes, nadakpan kini niadtong Agosto 28, 2025 sa Taboan Public Market, Barangay San Nicolas Proper, Cebu City.
Gisakmit kini sa kapulisan ug gilatid sa iyang katungod sa hustisya sa dihang gidala sa estasyon aron ipailalom sa booking ug dokumentasyon. Kasong Murder ang gisang-at batok kaniya sa Office of the City Prosecutor.
Si CCPO Acting City Director, PCOL Enrico Evangelista Figueroa, mipasidungog sa paspas ug tinabangay nga aksyon sa kapulisan nga miresulta sa pagkadakop sa suspek. Padayon pa ang imbestigasyon aron mas masuta kung adunay laing tawo nga nalambigit sa kaso.
Source: CCPO
I via Renante Socia Lada